काठमाडौं- बीमा समितिले कोभिड–१९ बीमालेख (कोरोना बीमा) पुन : सुचारु गर्ने निर्णय गरेको छ ।

सरकारले जोखिम अर्थात् दायित्व बहन गर्न सहमति दिएपछि पुन : उक्त बीमा सेवा सुचारु गर्ने निर्णय गरिएको हो ।

कम्पनीको पुँजीभन्दा दायित्व बढी भएपछि बिहीवार मात्र कोरोना बीमा कारोबार स्थगित गर्ने निर्णय गरिएको थियो । तर, समितिले त्यसको भोलिपल्ट अर्थात् शुक्रवार उक्त निर्णय उल्टाएको हो ।

समितिका कार्यकारी निर्देशक राजु रमण पौडेलले शुक्रवार एक विज्ञप्ति जारी गर्दै कोरोना बीमा सेवा पुनः सुचारु गर्न बीमा कम्पनीहरुलाई निर्देशन दिएका हुन् ।

यद्यपि अब जारी हुने बीमालेख (पोलीसी ) ले आगामी चैत मसान्तसम्मको मात्र जोखिम बहन गर्नेछ ।