मकवानपुर- कृषियोग्य जमिनको सदुपयोग गर्दै उत्पादन बढाउन हेटौंडा उपमहानगरपालिकाले नयाँ अभ्यास थालेको छ । उपमहानगरपालिकाले कृषियोग्य जमिन बाँझो नराख्न आम सर्वसाधारणलाई आग्रह गरेको छ ।

लामो समय सम्मको लकडाउनपछी खाद्यान्नको समस्या हुने भएकाले बाँझो अवस्थामा रहेका जमिन खाली नराख्नका लागि उपमहानगरपालिकाका मेयर हरिबहादुर महतले आग्रह गरे । अहिले खाली अवस्थामा रहेका खेतबारीलाई तत्काल उपयोगमा ल्याउनुपर्ने उनको भनाई छ ।

उपमहानगरपालिकाले चालु आर्थिक वर्षमा किसानका लागि प्रविधि हस्तान्तरण, कृषिमा आधुनिकीकरणमा जोड दिएको छ । आउँदो आर्थिक वर्ष र यो वर्ष पनि बाँकी रहेको बजेटलाई उर्वर जमिनलाई उपयोगमा ल्याउनेगरी काम गर्न लागिएको मेयर महतले बताए ।

लामो समयको लकडाउनका कारण बेरोजगारी समस्या बढ्दै गएकाले कृषि क्षेत्रमा लाग्ने युवाहरुलाई सहयोग गरिने उपमहानगरपालिकाको योजना छ ।

कोरोना भाइरसको महामारीका कारण रोजगारी क्षेत्रमा बढी असर पर्न गएकाले नगर क्षेत्रमा खेती योग्य जमिन बाँझो नराख्नका लागि सवैमा आगैह गरिएको र किसानका लागि सहयोगका कार्यक्रम पनि ल्याइने मेयर महतले बताए ।