काठमाडौं– नेपाल स्वास्थ्य व्यवसायी परिषद्ले नेपालका कोरोना संक्रमितहरुमा देखिएको कोरोना भाइरसको जिनबारे अनुसन्धान गर्ने भएको छ ।

परिषद्का रजिष्ट्रार पुष्पराज खनालका अनुसार नेपालका संक्रमितहरुमा भएको कोरोना भाइरसको जिन पत्ता लगाउन लागिएको हो । स्वास्थ्य मन्त्रालयको निर्देशनमा परिषद्ले कोरोना संक्रमितमा भएको कोरोना भाइरसको जिन पत्ता लागाउन लागेको हो । त्यसका लागि परिष्दले विज्ञहरुसँग छलफल समेत गरेको रजिष्ट्रार खनालले बताए ।

‘कोरोना भाइरसको कुनचाहिँ जिन नेपालमा बढी छ वा कुन जिनले गर्दा नेपालीहमा कोरोना पोजेटिभ छ भनेर पत्ता लगाउन नेपालका भाइरोलोजीमा काम गर्ने विज्ञ र सम्बन्धित संख्याहरुसँग छलफल भयो,’ परिषद्का रजिष्ट्रार खनालले भने, ‘विज्ञहरुसँगको छलफलमा अब नेपालमा जिन सिकोइन्सिङ गर्नुपर्छ र कुन जिन देखिएको छ भनेर पत्ता लगाउन अब प्रक्रिया शुरु भएको छ ।’

परिषद्का रजिष्ट्रार खनालले छुट्टै मापदण्ड बनाएर छिट्टै अनुसन्धान शुरु गर्ने बताए । उनका अनुसार जिनको म्यापिङ गरेर भाइरसको संक्रमण पछि शरीरको रगतमा उत्पादन हुने एन्टिबडीको पनि अनुसन्धान गरिने छ ।