काठमाडौं– संघीय संसदमा नवनियुक्त महासचिव डा भरतराज गौतमले संविधान र कानूनलाई ध्यानमा राखी आफ्नो जिम्वारी वहन गर्ने प्रतिक्रिया दिएका छन् ।

मंगलबार पद तथा गोपनीयताको शपथ ग्रहण गरेपछि सञ्चारकर्मीसँग सङ्क्षिप्त प्रतिक्रिया दिँदै महासचिव गौतमले प्रतिनिधिसभा र राष्ट्रियसभाबीच समन्वय गर्ने आफ्नो मुख्य जिम्मेवारी भएको पनि बताए ।

गौतमले  सभामुख र राष्ट्रियसभाको अध्यक्षले आफूलाई महासचिवका रुपमा सिफारिश गरेकामा उनीहरुप्रति आभार प्रकट गरे ।

‘एउटा राष्ट्रसेवक कर्मचारीले आफ्नो ठाउँमा रहेर जे जस्तो भूमिका निर्वाह गर्नुपर्ने हुन्छ, संविधान, नियमावली र कर्मचारी प्रशासनसम्बन्धी व्यवस्थालाई ध्यानमा दिएर व्यावसायिकताका साथ काम सम्पन्न गर्ने प्रण गर्दछु,’ उनले भने ।

सङ्घीय संसद् सचिवालयका नवनियुक्त महासचिव डा भरतराज गौतमलाई मंगलबार सभामुख अग्निप्रसाद सापकोटाले पद तथा गोपनियताको शपथ गराएका थिए । सिंहदरबारमा मंगलबार आयोजित कार्यक्रममा सभामुखले महासचिवलाई पद तथा गोपनियताको शपथ गराएका हुन् । सो अवसरमा राष्ट्रियसभाका अध्यक्ष, सङ्घीय संसद्का विभिन्न समितिका सभापति, सांसद तथा सचिवालयका कर्मचारीको उपस्थिति थियो ।

शपथलगत्तै गौतमले महासचिवको कार्यकक्षमा पदवहाली गरेका थिए ।