काठमाडौं– सर्वोच्च अदालतमा मुद्दाको बढ्दो कार्यबोझको सम्बोधन तथा पुराना मुद्दाहरुको फर्छ्योटलाई प्रभावकारी बनाउन पेसी व्यवस्थापनको कार्य प्रारम्भ गरिएको छ ।

सर्वोच्च अदालत नियमावली र न्यायपालिकाको चौथो पञ्चवर्षीय रणनीतिक योजना लक्ष्यमा पुग्ने मुद्दा/रिटको सुनुवाईका लागि दुई चरणको पेशी व्यवस्थापको अभ्यास सुरु गरिएको हो ।

न्यायपालिकाको सरोकारवाला निकाय महान्यायाधिवक्ताको कार्यालय, नेपाल बार एशोसिएसन, सर्वोच्च अदालत बार एशोसिएसन लगायतका नियकायहरुसँगको छलफल परामर्शपछि पेसी व्यवस्थापनको कार्य प्रारम्भ सुरु गरिएको हो ।

जस अनुसार प्रत्येक कार्यदिनको बिहान १० बजेदेखि दैनिक पेसी सूचीको माध्यमबाट पेसीमा चढ्ने (पुरक पेसी) मुद्दा/निवेदनहरुको सुनुवाइ हुने व्यवस्था गरिएको छ ।

यसैगरी अतिरिक्त समयमा हुने सुनुवाईको लागि पुरक पेसीको छुट्टै पेसी सूची प्रकाशन गर्ने र नियमित समयमा सुनुवाई हुने मुद्दाको पेसी सूची नियमित समयमा प्रकाशन गर्ने, पुरक पेसीमा रहेका मुद्दा/निवेदनहरुको सुनुवाई विहान ११ः३० बजेसम्म गर्ने र त्यसपछि नियमित पेसी सूचीमा रहेका मुद्दा/रिटहरुको सुनुवाई ११ः३० बजेदेखि गर्ने व्यवस्था गरिएको सर्वोच्च अदालतले जनाएको छ ।

यसका लागि नियमित इजलासको र कार्यालय समय विस्तार समेत गरिएको छ ।

यसबाट अदालतमा पुराना मुद्दाहरुको छिटो छरितो फछर्यौट र न्यायपालिकाको चौथो पञ्चवर्षीय रणनीतकि योजनाको पुराना मुद्दाहरुको फर्छयौट सम्बन्धी लक्ष्यलाई दृष्टिगत गरी पुराना मुद्दाहरुको छिटो किनारा लगाउन त्यस्ता मुद्दाहरुलाई पुरक रुपमा पेसीमा राखी फछर्यौट गर्ने सम्मको तयारी भएको छ ।

यसरी दुई चरणमा पेशीको व्यवस्थापन गर्दा मुद्दा फछर्यौटमा उत्साहजनक उपलब्धी देखिएको सर्वोच्चले जनाएको छ ।

यसरी दुई चरणमा पेस व्यवस्थापन गर्दा विगतमा नियमित मुद्दामा पर्न गएको असरलाई न्यूनिकरण गरी मुद्दाको फछर्यौट गर्न सहज हुने देखिएको छ ।

सर्वोच्च अदालतले यसको प्रभावकारी कार्यान्वयनका लागि महान्यायाधिवक्ताको कार्यालय, नेपाल बार एशोसिएसन, सर्वोच्च अदालत बार एशोसिएशन, मिडिया लगायतका सबै सरोकारवाला निकायको सक्रिय सहभागिता र सहयोगको अपेक्षा गरेको जनाएको छ ।