काठमाडौं– एक दिवसीय क्रिकेटमा डेब्यु गरेका सुशन भारीले आईसीसी विश्वकप लिग २ मा उत्कृष्ट प्रदर्शन गर्दा ओमानले नेपाललाई १ सय ९८ रनको मध्यम लक्ष्य दिएको छ ।

टस हारेर पहिलो ब्यटिङ गरेको ओमानले निर्धारित ५० ओभरमा ९ विकेट गुमाएर १ सय ९७ रन मात्रै बनाउन सक्यो । ओमानविरुद्ध नेपालका भारीले कसिलो बलिङ गर्दै ३ विकेट लिँदा ओमान १९७ रनमा सीमिति हुन पुग्यो ।

ओमानका लागि मोहम्मद नादेमले आफ्नो टोलीको ब्याटिङ लाइन सम्हालेका थिए । उनले अर्धशतक सहित ६९ रन बनाए । ५७ रनमा ५ विकेट गुमाएको ओमानका लागि नादेम र सन्दीप गौडले ६० रनको साझेदारी पारी खेले ।

ओमानका सन्दीप गौडले ३३ रन, नासेम खुसीले २८ रन, कप्तान जिसान मक्सुदले २० रन र अक्विब इल्यासले १६ रनको योगदान गरेका थिए ।  भारीसँगै नेपालका तीव्र गतिका बलर करण केसीले ४ विकेट लिए ।

केसीले ९ ओभर बलिङ गर्दै ४ विकेट लिएर ४७ रन खर्चिएका थिए ।  लिग २ को पहिलो खेलमा ओमानविरुद्ध नेपालका लागि भारीले उत्कृष्ट ३ विकेट सहित १४ रन खर्चिँदा स्टार स्पिनर सन्दीप लामिछाने भने सबैभन्दा महंगा सावित भए ।

लामिछानेले १० ओभर बलिङ गर्दै १ मेडन ओभरसहित ४५ रन खर्चिएका थिए । भारीसँगै  एक दिवसीय क्रिकेटमा डेब्यु गरेका अविनाश बोहरा भने विकेट विहीन रहे ।

१ सय ९८ रनको मध्यम लक्ष्य पाएको नेपाली टोली अहिले जवाफी ब्याटिङमा उत्रिएको छ । नेपालका लागि पूर्वकप्तान पारस खड्का र कप्तान ज्ञानेन्द्र मल्लले ब्याटिङ गरिरहेका छन । लामो समयपछि त्रिवि मैदानमा अन्तर्राष्ट्रिय खेल हुँदा दर्शकको सहभागिता उत्साहजनक छ ।