सिन्धुपाल्चोक – ​पहिरोका कारण डेढ महिनादेखि बन्द भएको तातोपानी नाकाबाट  चिनियाँ सामग्री भित्रिन शुरु भएको छ । यसअघि असोज १३ गते नेपाली अधिकारी र चिनियाँ अधिकारीबीच तातोपानी नाका सुचारु गर्ने सहमति भएको थियो ।

नेपालका लागि आइतबार ११ कन्टेनर कपडा र कच्चा पदार्थहरु आएको तातोपानी भन्सार कार्यालयका प्रमुख लालबहादुर खत्रीले बताए ।

खत्रीका अनुसार चिनियाँ पक्षले सामान मितेरी पुलमा अनलोड गरेर फर्किसकेको छ । नेपालका तर्फबाट ११ वटा कन्टेनर मितेरी पुलमा सामान लोड गर्न गएका छन् ।

बेलुकासम्म ती सामान तातोपानी सुख्खा बन्दरगाहमा आइपुग्ने जनाइएको छ । भन्सार जाँच पास भएपछि केही दिनमा ती सामान काठमाडौं पठाइएको छ ।

कोरोना भाइरसको सङ्क्रमण नहोस् भन्ने उद्देश्यले तातोपानी भन्सार कार्यालयले २९ जनाको दुई टोलीलाई सामान लोड/अनलोड गर्ने टिम तयारी राखेको छ । उनीहरूको ५/५ दिनमा कोरोना परीक्षण गरिने व्यवस्था मिलाइएको छ ।

केही समयदेखि चीनसँग जोडिएका दुई नाका बन्द भएपछि चीनसँगको व्यापार रोकिएको थियो ।