काठमाडौं- कतारले सन् २०३० को एसियाली खेलकुद प्रतियोगिता (एसियाड) आयोजना गर्ने जनाउँदै आधिकारिक लोगो र नारा सार्वजनिक गरेको छ ।

कतारले २०३० को २१ औं एसियाली खेलकुद दोहामा गर्ने दावी यसअघि नै गरिसकेको थियो ।

अहिले दोहा २०३० आयोजक शहरको दावी कमिटीले त्यसको लोगो र नारा सार्वजनिक गरेको हो ।

कतार ओलम्पिक कमिटीका अध्यक्ष तथा दोहा २०३० एसियन गेम्स बिडिङ कमिटीका प्रमुख शेख जोन बिन हमाद बिन खालिफाले कतारी खेलाडी र समितिका प्रतिनिधिहरुसँगको भर्चुअल  बैठकमा एसियाडको आधिकारिक लोगो र नारा सार्वजनिक गरेका हुन् ।

एसियाली खेलकुदको नारा ‘योर गेट वे’ राखिएको छ । लोगोले भने कतारको परम्परा, आधुनिकताको संयोजन र एसियाको स्थायी विरासतको साथ जादुयी खेलहरूको आयोजना गर्ने प्रतिबद्धतालाई प्रतिविम्वित गरेको छ ।

कतारले पछिल्लो १५ वर्षमा विश्वका ठूला खेल प्रतियोगिताहरुको सफल आयोजना गरिसकेको छ । यसअघि दोहाले सन् २००६ मा १५ औं संस्करणको एसियाली खेलकुदको आयोजना गरेको थियो ।

त्यसयता कतारमा एथलेटिक्स, ह्यान्डबल, जिम्न्यास्टिक्स जस्ता विश्व च्याम्पियनसिपको आयोजना भइसकेका छन् ।

गतवर्ष आइएएएफ विश्व एथलेटिक्स च्याम्पियनसिपको आयोजना गरेको कतारले सन् २०२२ को विश्वकप फुटबल आयोजना गर्दैछ ।

दोहाका साथै साउदी अरेवियाको रियाद शहरले पनि एसियाली खेलकुद २०३० को आयोजनाको दावी गरेको छ।

अब ओलम्पिक काउन्सिल अफ एसिया ओसिएको नोभेम्बर ३० मा बस्ने साधारण सभाले आयोजक राष्ट्र छान्नेछ।