दोहा – छुट्टीमा नेपाल गएका श्रमिकहरु अब पुनः बहराइन फर्कन सक्ने भएका छन् । विभिन्न स्वास्थ्यसम्बन्धी मापदण्ड पूरा गरेर फर्कन पाउने बहराइनस्थित नेपाली दूतावासले जनाएको हो ।

दूतावासका अनुसार विश्वव्यापी कोरोना महामारीको कारण उडान स्थगित हुँदा फर्किन नपाएकाहरु अब कोरोना सम्बन्धी स्वास्थ्य मापदण्ड पूरा गरेर फर्किन पाउने भएका हुन् ।

दूतावसले  छुट्टीमा गएकाहरु बहराइन आउन सक्ने भन्दै २११ जनाको सूची समेत सार्वजनिक गरेको छ ।

दूतावासका अनुसार बहराइन फर्किँदा यी नियमहरु भने पालना गर्नुपर्ने छ –

• बहराइन फर्किनेहरुको भ्यालिड भिषा, श्रम स्वीकृति, कोरोनाको नेगेटिभ रिपोर्ट तथा कागजात साथमा हुनुपर्ने छ ।
• आफ्नो रोजगारदाताले रोजगार दिने अस्थयी ग्यारेन्टी आफैले गर्नुपर्ने हुन्छ
• बहराइन पुगेपछि ३० बिडी शुल्क तिरेर कोरोना परीक्षण गराई ७ दिन आइसोलेसन बसेर पुन: ३० बिडी शुल्क तिरेर कोरोना परीक्षण गराउनुपर्ने दूतावासले जनाएको छ ।
• बहराइन पुगेपछि कुनै कारण अध्यागमन विभागले फिर्ता गरेमा त्यसको जिम्मा समेत आफैले लिनु पर्नेछ ।

बहराइनबाट विभिन्न समयमा छुट्टीमा नेपाल गएका धेरै नेपाली कामदारहरु कोरोनाका कारण हवाई उडान स्थगित हुँदा पुनः बहराइन फर्कन सकेका छैनन् ।