काठमाडौं- सत्तारुढ दल नेपाल कम्युनिष्ट पार्टी (नेकपा) को विवाद हल गर्न नेताहरुको दौडधुप जारी छ । आज अध्यक्ष पुष्पकमल दाहाल प्रचण्डले पार्टी उपाध्यक्ष वामदेव गौतमसँग भेटवार्ता गरेका छन् ।

गौतमलाई भेट प्रचण्ड भैसेपार्टी पुगेका थिए । दुवै नेताबीच पार्टीको विवाद हल गर्ने विषयमा छलफल भएको थियो ।

उपाध्यक्ष गौतमले पार्टीको विवाद मिलाउन यहि श्रावण १३ गते ६ बुँदे प्रस्ताव गर्दै प्रधानमन्त्री ओलीले प्रधानमन्त्री र अध्यक्ष दुवैबाट राजीनामा दिनु हुदैन भन्ने पक्षमा उभिएपछि नेकपाको विवादले नयाँ मोड लिएको छ ।

अध्यक्ष प्रचण्डले गौतमसँग अहिलेको विवाद र समाधानका बारेमा छलफल गरेको बुझिएको छ । यस अघि प्रधानमन्त्री ओलीपनि यहि श्रावण १३ गते साँझ वामदेव निवास पुगेर फर्किएका थिए ।

प्रचण्डले पार्टीका स्थायी कमिटी र केन्द्रीय कमिटीमै सबै समस्याको समाधान खोजिनुपर्ने बताउदै आएका छन् ।

प्रधानमन्त्री ओलीले भने आफुले पार्टीको अध्यक्ष र प्रधानमन्त्रीबाट राजीनामा गर्ने बाहेक अन्य विषयमा मात्र छलफल गर्न तयार रहेको बताउदै आएका छन् ।

यसअघि अन्तिम पटक दुवै अध्यक्षबीच सोमबार छलफल भएपनि कुनै निष्कर्ष भने निस्किएको छैन । दुवै अध्यक्षबीच आज पनि छलफल हुने बताइएको छ ।