काठमाडौं – भारतीय रक्षामन्त्री राजनाथ सिंहले हालसालै नेपालले जारी गरेको नक्सा कसैको उक्साहटमा भएको बताएका छन् ।

मंगलबार एक भारतीय टेलिभिजन च्यानललाई अन्तरवार्ता दिँदै सिंहले चीनको नाम नलिई भनेका छन्, मैले कसैमाथि आरोप लगाउन चाहन्न तर केही न केही कतैबाट त अवश्य पनि छ ।’

नेपालले जे गरिरहेको छ, त्यसमा चीनको हात हुन सक्छ भन्ने प्रस्तोताको प्रश्नको जवाफ दिँदै रक्षामन्त्री सिंहले यस्तो बताएका हुन्।

नेपाल अरु कसैको स्वार्थमा चलेको भन्ने भारतीय सेना प्रमुखको भनाई सार्वजनिक भएको केही दिनमै रक्षामन्त्री सिंहले सेना प्रमुखको भनाईलाई नै बल पुग्नेगरी अभिव्यक्ति दिएका हुन्।

सिंहले नेपालसँग सयौँ वर्षदेखिको भावनात्मक सम्बन्ध भएकाले भारतले त्यो सम्बन्धलाई कुनै पनि हालतमा टुट्न नदिने र असमझदारीलाई बार्तामार्फत टुंग्याउने प्रतिबद्धता जनाएका छन् ।