महोत्तरी – महोत्तरीको एकडारा गाउँपालिका–९ गेनाबथनाहामा एक लागुऔषध कारोबारीले कुखुराको खोरमा गाँजाको भण्डार नै बनाएको फेला परेको छ ।

लागुऔषध गाँजाको ओसारपसार र कारोवारमा संलग्न रहदै आएका लक्ष्मी चौधरीले झण्डै दुई क्विन्टल गाँजा पोका बनाएर राखेको अवस्थामा फेला पारिएको जिल्ला प्रहरी कार्यालय महोत्तरीले जानकारी दिएको छ।

१६ प्लाष्टिकका पोका र दुई वटा बोरामा राखेर कुखुराको खोरमा थन्क्याइएको १८० किलो गाँजा बरामद गरेको जिल्ला प्रहरी कार्यालय महोत्तरीका प्रहरी उपरीक्षक श्यामकृष्ण अधिकारीले जानकारी दिए ।

गत मंगलबार राति प्रहरी निरीक्षक केदार बस्नेत नेतृत्वको प्रहरी टोलीले कुखुराको खोरमा गाँजा भण्डारण गरेको पत्ता लगाएको थियो । कारोवार सञ्चालन गर्दै आएका ५२ वर्षीय चौधरी भने फरार छन् ।

जिल्लामा पछिल्ला तीन वर्षयता यति धेरै परिमाणमा गाँजा फेला परेको यो पहिलो हो । भारतसँग सीमा जोडिएको एकडारा गाउँपालिका लागुऔषध गाँजाको सघन ओसारपसार हुने केन्द्रका रूपमा चिनिने गरिन्छ ।