मुम्बई – कोरोना भाइरसका कारण भारतमा पनि लकडाउन छ । बलिउडका सबै सेलिब्रेटी आफ्नै घरमा छन् । कोरोनाबाट बच्न सबै सेलिब्रेटीले फ्यानलाई सचेत पनि गराएका छन् ।

दीपिका पादुकोण र रणवीर सिंह पनि लगातार सामाजिक सञ्जालका माध्यमबाट आफ्ना फ्यानसँग जोडिएका छन् । उनीहरुले सामाजिक सञ्जालका माध्यमबाट तस्वीर र भिडियो शेयर गर्ने गर्छन् ।

दीपिकाले घरमा खाना पकाउँदै गरेको तस्वीर पनि शेयर गरेकी थिइन् । यतिबेला भने उनले लकडाउनका वेला दुई फिल्म सिफारिस गरेकी छिन् ।

उनले हलिउड फिल्म ‘हर’ र ‘फ्यान्टम थ्रेड’ हेर्न सिफारिस गरेकी छिन् । यी दुवै फिल्मलाई समीक्षकले रुचाएका थिए ।

फिल्मको कुरा गर्नुपर्दा दीपिकाले अभिनय गरेको फिल्म ‘छपाक’ पछिल्लोपटक रिलिज भएको थियो । यो फिल्मले व्यावसायिक सफलता हात पार्न नसके पनि समीक्षा राम्रो पाएको थियो ।

उनले हालै शकुन बन्नाको फिल्म साइन गरेकी छिन् । उक्त फिल्ममा सिद्धान्त चतुर्वेदी र अनन्या पाण्डेलाई पनि देख्न सकिनेछ ।