एजेन्सी- कोरोना भाइरसका कारण विश्वभर त्रास बढिरहेका बेला आगामी सेप्टेम्बर महिनामा हुन लागेको संयुक्त राष्ट्रसंघको महासभा अनिश्चित बनेको छ ।

१९३ सदस्य राष्ट्र सम्मिलित महासभा बैठक आयोजना गर्ने/नगर्ने विषय यही महिनाभित्र टुंग्याइने समाचार संस्था एपीले जनाएको छ ।

महासभाका अध्यक्ष नाइजेरियाली कूटनीतिज्ञ तिजानी मोहम्मद बन्देलाई उद्धृत गर्दै एपीले जनाएअनुसार करिब ५ महिनापछि हुन गइरहेको महासभा गर्ने नगर्ने निर्णय यही महिनाभित्र लिइने छ ।

हरेक वर्ष सेप्टेम्बर महिनाको तेश्रो मंगलबार बस्ने महासभा बैठक यो वर्ष सेप्टेम्बरको २२ तारिखका दिन परेको छ ।

कोरोना भाइरसका कारण राष्ट्रसंघले अप्रिल र मे महिनाका लागि तय भएका विभिन्न कार्यक्रमहरु स्थगित गरिसकेको छ ।