काबुल– कतारको राजधानी दोहामा शान्ति सम्झौता भएयता अमेरिकाले पहिलो पटक तालिबान लाडाकुलाई लक्षित गरी हवाई आक्रमण गरेको छ ।

अमेरिकी वायु सेनाका लडाकु विमानले अफगानिस्तानको दक्षिणी हेल्मण्ड प्रान्तमा तालिबान लडाकुलाई लक्षित गरी हवाई आक्रमण गरेको अफगानिस्तानस्थित अमेरिकी फौजका प्रवक्ताले जनाएका छन् । तालिबान लडाकुले सरकारी सेनामाथि आक्रमण गर्न खोजेपछि उनीहरुविरुद्ध हवाई आक्रमण गरिएको अमेरिकी फौजको भनाइ छ ।

अफगानिस्तानमा अमेरिकी फौजका प्रवक्ता कर्णेल सोनी लेगेटका अनुसार तालिबानविरुद्ध रक्षात्मक हवाई आक्रमण गरिएको हो ।

उनले अमेरिका अफगानिस्तनमा शान्ति स्थापनाका लागि प्रयासरत रहेको र तालिबानले पनि मुलुकमा हिंसा अन्त्य गर्नुपर्ने जनाएका छन् ।

तालिबान र अमेरिकाबीच गत शनिबार कतारको राजधानी दोहामा शान्ति सम्झौता भएको थियो । सम्झौताअनुसार अमेरिकाले अफगानिस्तानमा रहेका आफ्ना सैनिक संख्या कटौती गर्ने उल्लेख थियो ।