काठमाडौं–नेपाली कांग्रेसका वरिष्ठ नेता रामचन्द्र पौडेल समूहले जिल्ला उपसभापतिहरुको प्रशिक्षण बहिष्कार गर्ने भएको छ ।

बुधवार विहान पूर्वमहामन्त्री प्रकाशमान सिंहको निवास चाक्सीवारीमा भेला भएका पौडेल समूहका उपलब्ध केन्द्रीय सदस्य र जिल्ला सभापतिहरुको भेलाले जिल्ला उपसभापतिहरुको प्रशिक्षण बहिस्कार गर्ने निर्णय गरेको हो ।

सभापति देउवाले विभागहरु गठन गरेसँगै पौडेल पक्ष पुन असन्तुष्ट देखिएको छ । बैठकले १४औं महाधिवेशन प्रभावित गर्ने उद्देश्यमा साथ कार्यक्रम राखिएको ठहर गर्दै उपसभापतिहरुको भेला बहिस्कार गर्ने निर्णय लिएको नेताहरुले बताएका छन् ।

‘हरेक कुराको काम गर्ने समय हुन्छ । समय घर्किएसँगै गर्ने काम ठिक हुँदैन’ नेता सिंहले भने,‘ महाधिवेशनको तिथि मिति तोकिसकेको कारण पार्टी भित्र निर्वाचन आचार संहिता लागू भइसकेको छ । महाधिवेशनलाई प्रत्यक्ष र परोक्ष प्रभावित गर्ने काम पार्टीले गर्नु हुँदैन ।’
‘यो भेलाबाट महाधिवेशनलाई प्रभावित गर्ने कार्यक्रम भएका कारण प्रशिक्षणलाई वहिष्कार गर्ने निष्कर्ष निस्किएको छ,’ नेता सिंहले भने ।

केही समययता सामसुम भएको नेपाली कांग्रेस भित्रको विवाद पुन बल्झिएको छ ।