काठमाडौं – एसीसी इस्टर्न रिजन टी-ट्वान्टी कप क्रिकेटमा आफ्नो तेस्रो खेलमा नेपालले आज  आयोजक थाइल्याण्डसँग खेल्दैछ ।

बैंककमा हुने नेपाल र थाइल्याण्डबीचको खेल नेपाली समय अनुसार अहिले बिहान ८:१५ बजे सुरु हुनेछ ।

टेर्डथाई क्रिकेट मैदानमा मैदान उत्रँदा दुवै टोली पहिलो जितको खोजीमा हुनेछन् । तर, प्रतियोगिताबाट बाहिरिसकेको थाइल्याण्डलाई भन्दा नेपाललाई यस खेल निकै महत्वपूर्ण रहेको छ ।

नेपाल यस प्रतियोगिताबाट उपाधि जित्दै एसिया कप छनोटमा पुग्न चाहन्छ । पाँच राष्ट्र सहभागी इस्टर्न रिजनको फाइनल पुग्ने दुई टिमले एसिया कप छनोटमा स्थान बनाउने छन् ।

त्यसैले शीर्ष दुईमा स्थान बनाउन नेपाललाई थाइल्याण्डविरुद्ध फराकिले जित निकाल्नुको विकल्प छैन । नेपाललाई अन्य टोलीको नतिजामा पनि भर पर्नु पर्नेछ ।

मुख्यत नेपालले शीर्ष दुईमा स्थान बनाउन हङकङको भर पर्नु पर्नेछ । हङकङले बाँकी रहेको खेलमा फराकिलो जित हात पारे नेपालले शीर्ष दुईमा स्थान बनाउने समिकरण रहेको छ ।

यसर्थ आजको खेलमा नेपालले आयोजकमाथि ठूलो रन रेट बनाउने लक्ष्य सहित खेल्नु पर्नेछ । नेपाल २ खेलमा २ हार व्यहोर्दा अंक जोड्न सकेको छैन । नेपाल तालिकाको पुछारबाट दोस्रो स्थानमा रहेको छ ।