काठमाडौं– प्रहरीले १ सय ८९ थान मोबाइलसहित एक जना तिब्बतीलाई पक्राउ गरेको छ ।

महानगरीय बृत्त थानकोट तथा महानगरीय प्रहरी प्रभाग नागढुंगाबाट खटिएको प्रहरी टोलीले मंगलबार चन्द्रागिरी नगरपालिका वडा नम्बर २ नागढुंगा चेक प्वाइन्टमा मोबाइल बरामद गर्नुका साथै तिब्बतीलाई नियन्त्रणमा लिएको हो ।

काँकडभित्ताबाट काठमाडौंतर्फ आउँदै गरेको प्रदेश ३-०१-००६ ख ०२४७ नम्बरको काँकडभित्ता–काठमाडौं चल्ने बसमा चेकजाँच गर्ने क्रममा बसको डिकीमा लुकाएर ल्याइएको सो परिमाणको मोबाइल प्रहरीले बरामद गरेको महानगरीय प्रहरी बृत्त थानकोटका प्रमुख घनश्याम श्रेष्ठले बताए ।

महानगरीय प्रहरी प्रभाग नागढुंगाबाट खटिएको प्रहरी निरीक्षक हेमन्त विक्रम थापा नेतृत्वको टोलीले उक्त मोबाइलसहितको सुटकेश लिन आएका तिब्बती ४० वर्षीय स्यान्जियल ग्यायलाई भने गंगबुबाट नियन्त्रणमा लिएको हो ।

उक्त मोबाइलहरूको अनुमानित बजार मूल्य रु २१ लाख ७३ हजार ५ सय रहको प्रहरीले बताएको छ । घटनाका विषयमा प्रहरीले थप अनुसन्धान जारी राखेको छ ।