काठमाडौं – अस्ट्रेलियाको बिग बास क्रिकेट लिग (बीबीएल) मा आज मेलबर्न डर्बीबीचको खेल हुँदैछ । नेपाली समय अनुसार दिउँसो १ बजेर ५५ मिनेटमा शुरु हुने खेलमा नेपाली लेग स्पिनर सन्दीप लामिछानेले मेलबर्न रेनेगेड्सविरुद्ध खेलमा पुनरागमन गरेका छन् ।

मेबलन स्टार्सबाट बीबीएल खेलिरहेका सन्दीपले इन्जुरीका कारण अघिल्लो सिड्नी थन्डरविरुद्धको खेल गुमाएका थिए । यो खेलमा मेलबर्न ३ विकेटले विजयी भएको थियो ।

यो सिजनमा मेलबर्नको पहिलो रोजाईमा परिरहेका सन्दीपले अहिलेसम्म भएका ५ मध्ये ४ खेल खेलेका छन् । जसमा उनले तीन खेलमा विकेट लिएका छन् । सन्दीपले विकेट कम लिएपनि रनमा भने नियन्त्रण गरिरहेका छन् ।

मेलबर्न ५ खेलमा ४ खेलमा जीत हात पार्दै लिगको अंक तालिकामा शीर्ष स्थानमा छ ।

अघिल्लो सिजनको उपाधिका लागि पनि मेलबर्न डर्बी भिडेका थिए । उक्त खेलमा मेलबर्न स्टार्स रेनेगेड्ससँग १३ रनले पराजित हुँदै उपविजेतामा सिमित भएको थियो ।

स्टार्स आजको खेलमा अघिल्लो सिजनको फाइनलको हारको बदला लिने लक्ष्यमा रहेको छ । मेलबर्न स्टार्सले रेनेगेड्ससँग खेल्ने १३ सदस्यीय टोलीको घोषणा गरिसकेको छ ।