काठमाडौं- टोटेनहम र ईङ्ल्याण्डका फरवार्ड ह्यारी केनले चोट बोकेका छन् । क्लबका अनुसार उनको ह्यामस्ट्रिङ च्यातिएको छ ।

बुधबार साउथह्याम्टनसंग पराजित भएको खेलमा उनले निकै अहसज महशुश गरेका थिए । शुक्रबार प्रशिक्षक जोसे माउरिन्होले आफुले खराब समाचारको आश गर्दै गरेको बताए ।

केन मैदान फर्कने बिषयमा कुनै टुङ्गो लागेको छैन । तर उनी केही साता मैदान बाहिर रहने पक्का भएको छ ।

‘उनी को हुन् भनेर सबैलाई थाहा छ । उनी टिमका लागि कति महत्वपूर्ण छन्, त्यो कुरा प्रशंसक र क्लबले बुझेको छ ।’ माउरिन्होले भनेका छन् ।

‘उनको स्तर, टिमले उनीसंग खेल्दा, खेलको प्रत्येक मिनेटमा उनी नहुँदा हामी सम्झिनेछौ । उनी नखेल्ने कुनैपनि खेलमा हामी उनलाई सम्झिनेछौ ।’ उनले थपेका छन् ।

क्लबले विज्ञप्ति जारी गर्दै केनको ह्यामस्टिङ च्यातिएको पुष्टि गरेको छ ।

‘हाम्रो मेडिकल टोलीले चोटको बिषयमा निरन्तर जाँच गरिरहेको छ । उपचार अगाडी बढिरहेको छ,’ विज्ञप्तिमा भनिएको छ ।

केनले देश र क्लबका लागि २७ खेलमा ३१ गोल गरेका थिए ।