काठमाडौं- कोशी अस्पताल विराटनगरमा मृत्यु भएका एकजना वृद्ध पुरुषमा कोरोना संक्रमण पुष्टि भएको छ ।

विराटनगर महानगरपालिका वडा नम्बर ५ का ७७ वर्षका पुरुषको मृत्यु पछि कोरोना पुष्टि भएको अस्पतालका सूचना अधिकारी विष्णुबहादुर बुढाथोकीले खबरहबलाई बताए ।

सूचना अधिकारी बुढाथोकीका अनुसार ती वृद्ध पुरुषलाई आज बिहान साढे ११ बजे मात्र कोशी अस्पतालको आइसोलेसनमा ल्याइएको थियो ।

उनको अस्पतालमा ल्याउने वित्तिकै कोरोना परीक्षणका लागि नमुना संकलन गरी प्रयोगशालामा पठाइएको थियो ।

ती वृद्ध पुरुषको आज दिउँसो ३ बजे आइसोलेसनमै उपचारका क्रममा मृत्यु भएको र रिपोर्ट भने केही समय अघि पोजेटिभ आएको सूचना अधिकारी बुढाथोकीले बताए ।

‘अस्पतालको आइसोलेसनमा आज विहान साढे ११ बजे भर्ना भएका ७७ वर्षका पुरुषको ३ बजे मृत्यु भयो,’ सूचना अधिकारी बुढाथोकीले भने, ‘आइसोलेसनमा आउने वित्तिकै स्वाब लिएर प्रयोगशालामा पठाइएकोमा रिपोर्ट पोजेटिभ आयो ।’

सूचना अधिकारी बुढाथोकीका अनुसार मृतक पुरुषको शव अहिले कोशी अस्पतालको आइसोलेसनमै रहेको छ ।

उनको शव कोभिड १९ संक्रमितको शव व्यवस्थापन निर्देशिका अनुसार नेपाली सेनाले भोलि मात्र व्यवास्थप गर्ने सूचना अधिकारी बुढाथोकीले बताए ।