एजेन्सी- भारत-चीनबीच सीमाका विषयमा विवाद बढेपछि भारतीय प्रधानमन्त्री नरेन्द्र मोदी अचानक लद्दाख पुगेका छन् ।

गलवान उपत्यकामा दुई पक्षबीच झडप भएपछिको अवस्था बुझ्न गएका मोदीले झड्पमा घाइते जवान र त्यहां कार्यरत सेना र आईटीवीपीका अधिकारीहरुसँग अन्तर्क्रिया गरेका ५न् ।

भारतीय संचारमाध्यममा चीफ आफ डिफेन्स स्टाफ जनरल बिपिन रावत लेह जाने समाचार प्रकाशित भएपनि अचानक शुक्रवार भारतीय प्रधानमन्त्री मोदी नै सेना प्रमुख एम नरवणेसहित त्यहाँ पुगेका हुन् ।

यसअघि रक्षामन्त्री राजनाथ सिंह लद्दाख जाने कार्यक्रम भएपनि अन्तिम समयमा भ्रमण रद्द भएको थियो ।

मोदीको भ्रमण चीनलाई सन्देश दिन र फौंजको हौसला बढाउन भएको नवभारत टाइम्सले जनाएको छ ।
प्रधानमन्त्री मोदीले ११ हजार फिट उचाईमा रहेको नीमूमा सेनाका जवानका साथै लेफ्टिनेण्ट जनरल हरिंदर सिंहसंग सीमाको अवस्थाको वारेमा जानकारी लिएका थिए ।

१५ जुनमा भारत र चीनका सेनाबीच गलवान उपत्यकामा भएको झड्पमा २० भारतीय सैनिकको मृत्यु भएको थियो । उक्त घटनापछि दुवै देशको सम्बन्धमा दरार उत्पन्न भएको छ ।