काठमाडौं – नोबेल कोरोना भाइरस (कोभिड१९)बाट आक्रान्त सुदुरपश्चिम प्रदेशको डडेलधुरामा पीसीआर मेसिन किन्न संकलित रकम हस्तान्तरण गरिएको छ।

राजधानीमा शुक्रबार एक कार्यक्रम गरी मेसिन किन्न काठमाडौंमा संकलित रकम अभियानका संयोजक अमरबहादुर शाहीलाई हस्तान्तरण गरिएको हो।

राजधानीमा संयोजक शाहीको नेतृत्वमा ओलम्पियन दिपक बिष्ट, राष्ट्रिय क्रिकेट टोलीका प्रशिक्षक जगत टमटासहितको टोली रकम संकलनमा सक्रिय भएर लागेका थिए।

१ हप्ताको छोटो समयमा राजधानीमा ८ लाख १३ हजार रुपैयाँ संकलन भएको थियो। जुन संयोजक शाहीलाई हस्तान्तरण गरिएको छ।

डडेलधुरामा पीसीआर मेसिन पुगिसकेको र आजदेखि ट्रायलसमेत सुरु भएको र आइतबारदेखि सुचारु हुने अभियानका संयोजक शाहीले बताएका छन्।

मेसिन किन्न आवश्यक पर्ने ९६ लाख संकलन भइसकेका बताइएको छ। `अहिलेसम्म ह्युम्यानिटी फाउन्डेसनको खातामा ७४ लाख १५ हजार जम्मा भइसकेको छ। रकम उपलब्ध गराउने वचनवद्वतासहित अहिलेसम्म १ करोड २० लाख पुगिसकेको छ,’ संयोजक शाहीले भने ।

सुदुरपश्चिमका नागरिक समाज र हयुम्यानीटी फाउण्डेसनको संयुक्तरूपमा अभियान सञ्चालन गरिएको थियो। अभियानबाट आएको रकम फाउन्डेसनको खातामा जम्मा गरिएको छ।

मेसिन किन्न आवश्यक रकम संकलन भइसकेको हुँदा अभियानको समापन गरिएको अभियानका संयोजक अमरबहादुर शाहीले बताए ।

‘पीसीआर मेसिन नभएर समस्या भोगिरहेका बेला यो अभियान थालिएको थियो। एक मेसिन नै किन्ने पैसा उठेको छ,’ संयोजक शाहीले भने, ‘सहयोग माग्न गाह्रो थियो। दिन सक्ने अवस्था पनि थिएन। राम्रो सोच र विश्वास रह्यो भने मान्छे सधै तयार हुन्छन् भन्ने स्पष्ट पारेको छ।’