कैलाली – कैलालीको सेती प्रादेशिक अस्पताल र टीकापुर अस्पतालमा रहेका आइसोलेसन वार्ड भरिएपछि बिरामी राख्न समस्या भएको छ ।

आइसोलेसन वार्ड भरिएपछि थप कोरोना सङ्क्रमित राख्न समस्या भएको अस्पतालले जनाएको छ ।

कैलालीका यी दुवै अस्पतालमा रहेका आइसोलेसन वार्डमा सङ्क्रमित बिरामी भरिएपछि समस्या भएको छ ।

मङ्गलबार कैलालीका १० जनामा कोरोना पुष्टि भएपछि सङ्क्रमितलाई राख्न आइसोलेसन वार्डमा शैय्या अभाव भएको सेती अञ्चल अस्पतालले जनाएको छ ।

सेती प्रादेशिक अस्पतालसँग २४ शैय्या र टीकापुर अस्पतालमा १२ शैय्याको आइसोलेसन वार्ड छ । सेतीमा बिरामीको सङ्ख्या २५ पुगिसकेको छ ।

अझै गौरीगङ्गाका पाँच सङ्क्रमितलाई पनि सेती अस्पताल लैजाने तयारी भएको छ । अस्पतालका मेडिकल सुपरिडेण्डेन्ट डा. हेमराज पाण्डेले शैय्या अभाव भएकाले बिरामीलाई कहाँ राखेर उपचार गर्ने भन्ने समस्या भएको बताए ।

टीकापुर अस्पतालमा १२ शैय्याको आइसोलेसन वार्ड छ । यहाँ १३ जनाको उपचार भइरहेको छ ।

टीकापुरमा मङ्गलबार चार जनामा सङ्क्रमण देखिएपछि एक जनालाई शैय्या अभाव हुँदा अस्पतालका अन्य वार्डमा रहेको शैय्या प्रयोग गरेर बिरामी राख्नुपरेको अस्पतालले जनाएको छ ।

जिल्ला स्वास्थ्य कार्यालय कैलालीका प्रमुख लालबहादुर धामीले दुवै अस्पताल भरिएकाले अब अन्य ठाउँमा पनि विकल्प खोजी गरी बिरामी राख्ने व्यवस्था गर्न आवश्यक रहेको बताएका छन् ।