जनकपुरधाम– कोरोना भाइरस (कोभिड १९) महामारी नियन्त्रणका लागि जारी लकडाउनका बेला सिमेन्टको कालोबजारी गरेको अभियोगमा धनुषा प्रहरीले २ जनालाई पक्राउ गरेको छ ।

पक्राउ पर्नेमा जनकपुर उपमहानगरपालिका–११ स्थित आनन्द इन्टर प्राइजेजका सञ्चालक ४८ वर्षीय राम प्रताप साह र जनकपुर–४ माछाबजारस्थित चन्दन आइरन स्टोरका सञ्चालन सत्यनारायण चौधरीका २० वर्षीया छोरा चन्चल कुमार चौधरी छन् ।

प्रहरीका अनुसार दुवै जनालाई बजार भाउभन्दा बढी मूल्य लिएर सिमेन्ट बिक्री गर्दै आएका थिए ।

स्थानीय उपभोक्ताको सूचनाको आधारमा पुगेको प्रहरीले आनन्द इन्टर प्राइजेजको गोदामबाट ४९ बोरा सिमेन्ट समेत बरामद गरेको छ ।

यस्तै, जनकपुर–४ माछाबजारस्थित चन्दन आइरन स्टोरबाट ४ सय २० बोरा सिमेन्ट बरामद भएको जिल्ला प्रहरी कार्यालय धनुषाले जानकारी दिएको छ ।

प्रहरीले दुवै सिमेन्ट पसलमा सिलबन्दी गरेर आवश्यक अनुसन्धान अगाडि बढाइएको जनाएको छ ।