काठमाडौं –  बैशाख १ गतेका लागि राष्ट्रपति कार्यालय शितल निवासमा तय भएको विभूषण सुशोभन कार्यक्रम स्थगित भएको छ ।

विश्वभर फैलिएको कोरोना भाइरसको महामारीबाट सिर्जित विषम परिस्थितिलाई ध्यानमा राखेर विभूषित गरिने कार्यक्रम अर्को सूचना जारी नभइन्जेलका लागि स्थगित गरिएको गृह मन्त्रालयले आज जारी गरेको सूचनामा उल्लेख छ ।

विभूषण समितिले गरेको सिफारिसका आधारमा गत असोज ३ गते संविधान दिवसका अवसरमा ६ सय ३३ जनाको  नाम विभूषणका लागि सिफारिस गरिएको थियो ।

उनीहरुलाई यही बैशाख १ गते राष्ट्रपति विद्यादेवी भण्डारीले विभूषित गर्ने कार्यक्रम थियो ।

सरकारले विभिन्न क्षेत्रमा विशिष्ट योगदान पुर्‍याएबापत नेपाल रत्न, महाउज्ज्वल राष्ट्रदीप, सुप्रसिद्ध प्रवल जनसेवाश्री, उज्ज्वल कीर्तिमय राष्ट्रदीप, सुकीर्तिमय राष्ट्रदीप, सुप्रवल जनसेवा श्री, प्रवल जनसेवा श्री र जनसेवा श्री लगायत विभूषण तथा मानसम्मान हरेक वर्ष प्रदान गर्दै आएको छ ।