काठमाडौं– मृत्यु भइसकेका व्यक्तिको गलत औंठा छाप प्रयोग गरेर अर्कै व्यक्तिको नाममा जग्गा पास गरिदिने मालपोत कार्यालयका कर्मचारीसहित ८ जनाविरुद्ध भ्रष्टाचार मुद्दा दर्ता भएको छ ।

अख्तियार दुरुपयोग अनुसन्धान आयोगले भूमिसुधार तथा मालपोत कार्यालय सुनसरीका तत्कालीन मालपोत अधिकृत दधिराम गुरागाईँसहित ८ जनाविरुद्ध भ्रष्टाचार मुद्दा दायर गरेको हो ।

अख्तियारले गरेको अनुसन्धानबाट भूमिसुधार तथा मालपोत कार्यालय सुनसरीका तत्कालीन मालपोत अधिकृत दधिराम गुरागाईँसहित नायव सुब्बा मनोज घिमिरे, खरिदार कृष्ण प्रसाद नेपाल र अर्का खरिदार राम प्रसाद भट्टराईले मृत्यु भइसकेकी महिलाको नक्कली औंठा छाप प्रयोग गरी अर्कैै व्यक्तिको नाममा जग्गा पास गरिदिएको भेटिएको हो ।

उनीहरुले १० कात्तिक २०७० मा नै मृत्यु भइसकेकी सुनसरीको धरान उपमहानगरपालिका–१० की रनमाया लिम्बुको नक्कली औंठा छाप प्रयोग गरेर गलत बकस पत्र तयार तथा पारित गरी ३१ लाख ४५ हजार रुपैयाँ मूल्य बराबरको जग्गा गैरकानूनी रुपमा २८ मंसिर २०७६ मा हक नपुग्ने रत्नदेवी लिम्बुका नाममा पास गरिदिएका थिए ।

अख्तियारले भूमिसुधार तथा मालपोत कार्यालय सुनसरीका तत्कालीन मालपोत अधिकृत दधिराम गुरागाईँसहित नायव सुब्बा मनोज घिमिरे, खरिदार कृष्ण प्रसाद नेपाल र अर्का खरिदार राम प्रसाद भट्टराईविरुद्ध १ वर्ष कैद र १० हजार रुपैयाँ जरिवाना मागदाबी गर्दै मंगलबार विशेष अदालतमा मुद्दा दायर गरेको हो ।

अख्तियारका अनुसार उक्त प्रकरणमा साविक इटहरी नगरपालिका (हाल इटहरी उपमहानगरपालिका) सुनसरीका शाखा अधिकृत राजेन्द्र धिमालको समेत संलग्नता देखिएको छ । शाखा अधिकृत धिमालले जग्गाधनी रनमाया लिम्बु उपस्थित नै नभइ उनी उपस्थित भएको भनेर नगरपालिकाबा २४ मंसिर २०७० मा घर बाटो सिफारिस गरेका थिए । अख्तियारले उनीविरुद्ध पनि १ वर्ष कैद र १० हजार रुपैयाँ जरिवाना मागदाबी गरेको छ ।

अख्तियारले लेखापढी व्यवसायी पुस्कर प्रसाद पोखरेल, मृतक रनमाया लिम्बुको जग्गा आफ्नो नाममा नामसारी गराउने रत्नमाया लिम्बु र गलत लिखतका साक्षी बनेका गोविन्द कोइरालालाई समेत प्रतिवादी बनाएर मुद्दा दर्ता गरेको छ ।