काठमाडौं- नेपाल कम्युनिष्ट पार्टी (नेकपा)ले अमेरिकी परियोजना एमसीसीबारे अध्ययन गर्न गठन गरेको कार्यदलको पहिलो बैठकले कार्यदलको कार्यदिशाका  विषयमा छलफल गरेको छ ।

सोमबार नेकपा संसदीय दलको कार्यालय सिंहदरबारमा बसेको बैठकमा कार्यदलको कार्यादेशबारे छलफल भएको कार्यदलका संयोजक समेत रहेका नेकपा वरिष्ठ  नेता झलनाथ खनालले जानकारी दिए ।

उनले कार्यदलको कार्यदिशा, एमसीसीको अध्ययन गर्ने क्रममा चाहिने सामग्री लगायतका विषयमा छलफल भएको जानकारी दिए । उनले कार्यदलको अर्को बैठक बुधबार बस्ने र उक्त बैठकमा थप गृहकार्य हुने बताए ।

एमसीसी बारे अध्ययन गर्न पूर्वप्रधानमन्त्री एवम् नेकपा वरिष्ठ नेता झलनाथ खनालको संयोजकत्वमा आाइतबार तीन सदस्यीय कार्यदल गठन भएको थियो।

कार्यदलमा परराष्ट्र मन्त्री प्रदीप ज्ञवाली र स्थायी समिति सदस्य भीम रावल सदस्य रहेका छन्। कार्यदललाई प्रतिवेदन बुझाउन १० दिनको समय तोकिएको छ ।