काठमाडौं – नेपाली क्रिकेट टोलीका मुख्य प्रशिक्षक उमेस पटवालले २ हप्ता अगाडि नै राजीनामा दिने जानकारी गराएको निवर्नमान कप्तान पारस खड्काले बताएका छन् ।

नेपाल, अमेरिका र ओमानबीचको त्रिकोणात्मक शृङ्खलापछि आफू प्रशिक्षकमा नरहने उनले राष्ट्रिय टोलीका खेलाडीलाई जानकारी दिएको खड्काले बताएका हुन् ।

त्रिकोणत्मक शृङ्खलाको अभ्यासमा ढिलो गरी भारतबाट आएका उनले पोखरामा रहँदा नै टोलीका खेलाडीलाई आफूले राजीनामा दिने बताएका थिए ।

सोमबार पटवालले राजीनामा दिएको बताइए पनि अन्तर्राष्ट्रिय क्रिकेट परिषद् (आईसीसी)ले भने आधिकारिक पुष्टि गरेको छैन ।

‘उहाँले त्रिकोणात्मक सिरिज आफ्नो अन्तिम प्रतियोगिता रहेको जानकारी हामीलाई २ हप्ता अगाडि नै टोली पोखरामा हुँदा  जानकारी गराइसक्नु भएको थियो,’ निवर्तमान कप्तान खड्काले खबरहबसँग भने,‘ उहाँको १ बर्षको सम्झौता भए पनि व्यक्तिगत कारणले ४ महिना अगाडि नै छाड्ने तयारी गरेको बताउनु भएको थियो ।’

कप्तान खड्काका अनुसार प्रशिक्षक पटवालले २ हप्ता अगाडि नै आईसिसीलाई पत्र लेखिसकेका थिए ।

सिरिजको मुखैमा राजिनामाको घोषणा गरे पनि यसले सिरिजमा टोलीको प्रदर्शनमा कुनै असर नगर्ने खड्का बताउँछन् ।

‘यसले असर केही पनि गर्दैन । प्रशिक्षकले पूरा गर्नुपर्ने जिम्मेवारी उहाँले पुरा गरी नै राख्नु भएको छ । ‘एन्ड दी इन्ड’ खेलाडीले गएर खेल्नु पर्ने हो । उहाँले सिरिजको एक दिन अगाडि भन्नु भएको भए असर गर्थ्यो सायद ।  २ हप्ता अगाडि नै खेलाडीलाई खबर गरिसक्नु भएको थियो । त्यसकारण असर नपर्ला । ’

नेपाल क्रिकेट संघ निलम्बनमा रहँदा राष्ट्रिय खेलकुद परिषद् (राखेप) को पहलमा आईसीसीले उनलाई मासिक ७ हजार अमेरिकी डलर तलब दिने गरी गत जेठमा मुख्य प्रशिक्षकको जिम्मेवारी दिएको थियो ।

आईसिसीले प्रशिक्षक नियुक्त गरेका पटवालले विश्वकप लिग २ को खेल लगत्तै लागुहुने गरि राजीनामा दिएका हुन् । नेपाल क्रिकेट संघ क्यानका सचिव तथा प्रवक्ता असोकनाथ प्याकुरेलले प्रशिक्षक पटवालको राजीनामा बारे क्यानलाई जानकारी नभएको बताएका छन् ।

उनले भने ‘यस विषयमा हामीलाई कुनै जानकारी छैन् । यदि उहाँले राजीनामा नै दिनु भएको रहेछ भने पनि आईसीसीलाई दिनु भएको होला हामीलाई जानकारी छैन्,’ सचिव प्याकुरेलले खबरहबसँग भने ।

यो पनि पढौं

• सम्झौताको ४ महिना अगाबै राष्ट्रिय क्रिकेट टोलीका प्रशिक्षक पटवालको राजीनामा