काठमाडौं – बेलायतले फाइजर र बायोटेकले उत्पादन गरेको कोरोना भाइरससविरुद्धको भ्याक्सिन (खोप) प्रयोगका लागि अनुमोदन गरेको छ । बेलायतले सबै जनताका लागि खोप प्रयोगको अनुमोदन गरेको हो ।

योसँगै बेलायत सबैका लागि खोप प्रयोगको अनुमोदन गर्ने विश्वको पहिलो देश बनेको छ ।

बीबीसीले जनाएअनुसार यो खोप ९५ प्रतिशतसम्म सुरक्षित छ । र, यो खोप आगामी हप्तादेखि नै उच्च प्राथमिकतामा परेका व्यक्तिहरूलाई लगाउन थालिनेछ ।

बेलायतले यो खोपको चार करोड डोज मगाइसकेको छ । कम्पनीले जोखिममा परेका संक्रमितका लागि शुरुमा १ करोड खोप उपलब्ध गराउने र केही दिनमा थप डोज दिनेछ ।

फाइजर र वायोटेकले विकास गरेको खोपले विभिन्न चरण पार गरिसकेका छन् । खोप विकास भए पनि विश्वभर पुग्न समय लाग्ने भएकाले विशेषज्ञहरूले कोरोना भाइरसबाट जोगिन उचित ख्याल गर्न आग्रह गरेका छन् ।

यो खोपको प्रयोगसँगै मानिसहरू रोगसँग लड्न सक्ने दाबी गरिएको छ । यो खोपलाई माइनस ७० डिग्री तापक्रममा भण्डारण गरेर राख्नुपर्ने हुन्छ । खोप राख्न तयार पारिएका विशेष बाकसहरूमा यसलाई ५ दिनसम्म राख्न सकिन्छ । अति चिसो चापक्रममा राख्नुपर्ने भएकाले विकाशोन्मुख राष्ट्रमा यसको भण्डारणमा समस्या पर्ने आँकलन गरिएको छ ।

शुरुमा यो खोप बेलायतमा फ्रन्टलाइनमा काम गरिरहेका व्यक्ति, उच्च हेरचाह गर्नुपर्ने कर्मचारी, सामाजिक हेरचाहकर्मी तथा ८० वर्षभन्दा बढी उमेरका व्यक्तिहरूलाई दिइनेछ ।

यो खोप सन् २०२१ को सुरुवातसम्म सबैलाई पुर्‍याउन लक्ष्य लिइएको छ । यो दुई डोजमा इन्जेक्सनको रूपमा दिइन्छ । २१ दिनको फरकमा दोस्रो खुराक दिइन्छ ।