काठमाडौं : काठमाडौं महानगरपालिकाले खुलामञ्चमा खाना खुवाउने अभियानमा रोक लगाएको छ ।

सोमबार काठमाडौं नगर प्रहरीले खाना खुवाउँदै आएका अभियन्तालाई फोन गरेर अबदेखि सडकमा खाना नखुवाउन आदेश दिएको अभियन्ता दिपेश धुन्जुले बताए ।

नगर प्रहरी महाशाखाका प्रमुख धनपति सापकोटाले फोन गरेरै ‘माथिबाट आदेश भन्दै सडकमा खाना नखुवाउनु’ भनेको अभियन्ता धुन्जुले बताए ।

अर्का अभियन्ता बिमल पन्तले यस विषयमा महानगरमा बुझ्दा एक कर्मचारीले ‘सडकमा खाना खुवाउँदा बेइज्जत भयो’ भोलि (मंगलबार)बाट सडकमा खाना नखुवाउनु भन्ने जवाफ दिएको बताए ।

ति कर्मचारीले सडकमा भोलिबाट खाना नखुवाउनु, खुवाउनु परे आफ्नो घरमा लगेर खुवाउनु भन्ने रुखो जवाफ दिएको बताउँदै बिमलले खबरहबसँग भने, ‘हामी पछि हट्दैनौं जसरी पनि भोलि त्यही ठाउँमा खाना खुवाउँछौं, होइन भने हामीलाई खाना खुवाउने ठाउँ तोकिदिनुपर्‍यो ।’

अभियन्ताहरुले लामो समयदेखि खुलामञ्चम लगायतका विभिन्न ठाउँमा कोरोनाका कारण समस्यामा परेका श्रमिक, गरीब र असहायलाई  निशुल्क खान वितरण गर्दै आएका छन् ।

केही दिनदेखि महानगरले नगर प्रहरी नै पठाएर खाना वितरण गर्न रोक लगाउने गरेको अभियन्ताहरुको भनाइ छ  ।

चैत्र १४ बाट हन्ड्रेड ग्रुपले महालक्ष्मीथान, पशुपति, खुल्लामञ्च लगायत झन्डै दर्जन मठमन्दिरमा उनीहरुले निःशुल्क खाना खुवाइरहेका छन् ।