पोखरा – प्रहरीले कास्कीमा एकैदिन विभिन्न मुद्दामा फरार रहेका २८ प्रतिवादीहरुलाई पक्राउ गरेको छ ।

जिल्ला प्रहरी कार्यालय कास्कीका प्रमुख, एसपी जीवन श्रेष्ठका अनुसार जिल्ला अदालत तथा जिल्ला प्रशासन कार्यालयको फैसलाले विभिन्न मुद्दामा कैद र जरिवाना तोकी फरार २८ जनालाई मंगलबार पक्राउ गरिएको हो ।

उनका अनुसार, पक्राउ पर्नेमा स्याङ्जा कोल्मा स्थायी घर भई हाल कास्की पोखरा महानगरपालिका–२७ बस्ने २९ वर्षीय अनिल थापा मगर पक्राउ परेका छन् ।

यस्तै कास्की पोखरा महानगरपालिका–१० बस्ने बैकिङ् कसुर मुद्दाका ५३ वर्षीय धिरज गुरुङ र सार्वजनिक मुद्दामा २५० देखि ५ हजारसम्म जरिवाना तोकी हालसम्म फरार रहेका अन्य २६ जना पक्राउ परेका छन् ।

एसपी श्रेष्ठका अनुसार, पक्राउ परेका २८ जनालाई नै जिल्ला अदालत कास्की पठाइएको छ ।