काठमाडौं-सरकारले लकडाउनको ढाँचा फेर्ने विषयमा गृहकार्य थालेको छ ।

कोभिड–१९ संक्रमण रोकथाम तथा नियन्त्रण उच्चस्तरीय समितिले लकडाउनको स्वरुप परिवर्तन गर्ने सन्दर्भमा मंगलबार निजी क्षेत्रका छाता संगठनका प्रतिनिधिहरुसँग छलफल गरेको हो ।

कोरोना महामारीको समयमा नागरिकलाई सुरक्षित राख्दै उद्योग व्यवासय कसरी सञ्चालन गर्न सकिन्छ भन्ने विषयमा उनीहरुका राय सुझाव मागिएको प्रधानमन्त्री कार्यालयका सचिव नारायणप्रसाद बिडारीले जानकारी दिए ।

उनले विभिन्न क्षेत्रबाट प्राप्तसुझावलाई अध्ययन गरी उपयुक्त मोडालिटी तयार पारिने बताए । छलफलमा सहभागी नेपाल उद्योग वाणिज्य महासंघकी अध्यक्ष भवानी राणाले जोखिमको अवस्थालाई मध्यनजर गर्दै उद्योग व्यवसाय पनि संचालन गर्नुपर्नेमा जोड दिएको बताइन् ।

उनले जोखिमको तह र क्षेत्रलाई वर्गिकरण गरी  लकडाउन खुकुलो बनाउदै अर्थतन्त्रलाई चलायमान बनाउनुपर्ने धारणा राखेको जानकारी दिइन् ।

त्यसैगरी चेम्बर अफ कमर्शका अध्यक्ष राजेश काजी श्रेष्ठ कोरोनाको जोखिमलाई हेरेर उद्योग व्यवसाय सञ्चालनको वातावरण मिलाउन आग्रह गरेको बताए ।

यातायात व्यवसायी महासंघका महासचिव सिटौलाले उद्योगधन्दा संञ्चालन संगै सार्वजनिक यातायातका साधन पनि संञ्चालन गर्नु अत्यावश्यक भएकाले सामाजिक दुरी कायम गरि सञ्चालनको व्यवस्था मिलाउन सुझाव दिएको बताए ।

छलफलमा उद्योग वाणिज्य संघ नवलपरासीका अध्यक्ष चन्द्र भण्डारी, नेपाल निर्यात व्यवसायी महासघका महासचिव तथा पश्मिना उद्योग संघका अध्यक्ष दुर्गाविक्रम थापा लगायत सरोकारवालाहरुको सहभागिता रहेको थियो ।

पछिल्लो पटक सरकारले लकडाउनको अवधि लम्ब्याएर जेठ ३२ गतेसम्म पुर्‍याएको छ ।