काठमाडौं– नेपालमा कोरोना संक्रमित महिला भन्दा पुरुष बढी रहेका छन् ।

स्वास्थ्य मन्त्रालयका प्रवक्ता डाक्टर विकास देवकोटाका अनुसार ५९ जना कोरोना संक्रमित मध्ये ४९ जना पुरुष र १० जना महिला रहेका छन् । यी मध्ये १६ जना निको भएर घर फर्किसकेका छन् ।

४३ जना जना कोरोना संक्रमित मध्ये विराटनगरमा ३१, विरगञ्जमा ८, रुपन्देहीमा एकजना, धनगढीमा एकजना,भरतपुरमा एकजना चिकित्सकको निगरानीमा आइसोलेसनमा रहेका छन् । अस्पतालमा रहेका ४३ जना कोरोना संक्रमितको स्वास्थ्य अवस्था सामान्य रहेको प्रवक्ता डा देवकोटाले बताए ।

प्रवक्ता देवकोटाका अनुसार हालसम्म पिसीआर विधिबाट १३ हजार ९८ जनाको परीक्षण गरिएको छ भने आरडीटी विधिबाट ४८ हजार ५ सय २९ जनाको कोरोना परीक्षण गरिएको छ ।

यस्तै गत २४ घण्टामा १२ सय ५२ वटा नमूना परीक्षण गरिएको छ । कोरोना संक्रमित तथा आशंका गरिएका व्यक्तिहरु देशभर ८९ जना आइसोलेसनमा रहेका छन् भने देशभरका क्वारेन्टाइनमा २२ हजार ९ सय ७८ जना रहेका छन् ।

डा देवकोटाका अनुसार विराटनगरको प्रादेशिक जनस्वास्थ्य प्रयोगशालामा पनि पिसिआर विधिबाट कोरोना परीक्षण सुरु भएको छ । यो सँगै हाल देभरका १७ स्थानमा पिसिआर विधिबाट कोरोना परीक्षण शुरु भएको छ ।