काठमाडौं– सर्वोच्च अदालतका ३० न्यायिक अधिकारीको पहिलो ब्याचले भारतको जोधपुर शहरस्थित नेशनल ल युनिभर्सिटिमा ७ दिने प्रशिक्षण शुरु गरेका छन् ।

सोमबारबाट उनीहरुले ‘मुद्दा मामिला तथा अदालत व्यवस्थापन’ बारे प्रशिक्षण शुरु गरेका हुन् ।

सर्वोच्च अदालतकै ३० न्यायिक अधिकारीको दोस्रो ब्याचले चैत्र १० देखि १६ गते सम्म सोही विषयमा प्रशिक्षण लिनेछन् । नेपाल सरकारको अनुरोधमा तयार पारिएकोे यो एक विशेष कोर्स हो ।

न्यायालयको प्रशासनमा सूचना र सञ्चार प्रविधिको प्रयोग तथा मुद्दा तथा अदालत व्यवस्थापन सम्बन्धि मामिलालाई प्रभावकारी ढङ्गबाट समाधान गर्न यो कोर्षले अधिकारीहरुको क्षमतालाई अभिवृद्धि गर्ने दाबी गरिएको छ ।

भारत सरकारको पूर्ण सहयोगमा सञ्चालित रहेको यस कोर्स भारतीय विदेश मन्त्रालयको प्राविधिक तथा आर्थिक सहयोग कार्यक्रम अन्तर्गत आयोजना गरिएको हो ।

कानून सम्बन्धि सिकाई, बुझाई, अनुसन्धान तथा ज्ञानको विस्तारमा परिचित सो प्रतिष्ठित विश्वविद्यालयमा नेपाली अधिकारीले प्रशिक्षण लिइरहेका छन् ।