काठमाडौं– नेकपाका अध्यक्ष पुष्पकमल दाहाल ‘प्रचण्ड’ माथि जुत्ता प्रहार भएको घटना छानवीनका लागि समिति गठन भएको छ ।

सोमबार महानगरीय प्रहरी कार्यालय रानीपोखरीको निर्देशनमा समिति गठन गरिएको हो । प्रहरी वरिष्ठ उपरीक्षक(एसएसपी) सहकूल थापा संयोजक रहने गरि तीन सदस्यीय समिति गठन गरिएको हो ।

जसमा महानगरीय प्रहरी परिसर काठमाडौंका डीएपी होविन्द्र वोगटी र महानगरीय प्रहरी वृत्त सिंहदरबारका एक जना प्रहरी निरीक्षक(इन्स्पेक्टर) रहेका छन् ।

आइतबार राजधानीको राष्ट्रियसभा गृहमा आयोजित कार्यक्रममा सम्बोधन गरिसकेपछि प्रचण्डमाथि तिरुवाले जुत्ता प्रहार गरेका थिए । तर उनले प्रहार गरेको जुत्ता प्रचण्ड भएको स्थानसम्म पुगेन ।

प्रचण्डमाथि आक्रमण गर्ने तिरुवाले तत्कालै प्रहरी नियन्त्रणमा लिएको थियो ।

प्रहरीसँगको बयानमा भने तिरुवाले प्रचण्डको भाषणले आक्रोशित भएपछि जुत्ता प्रहार गर्न पुगेको बताएका थिए ।

‘प्रचण्डसँग मेरो कुनै दुश्मनी हैन । तर, आइतबारको त्यो कार्यक्रममा उनले गरेको भाषण सुन्दा एक्कासी आक्रोशित भएँ,’ तिरुवाको भनाइ उद्धृत गर्दै प्रहरी स्रोतले खबरहबसँग भन्यो, ‘वर्ग संघर्षका विषयमा उनले गरेको विश्लेषणले मलाई रिस उठ्यो । रिस उठेका बेला जुत्ता हान्न पुगेछु ।’