सिरहा– सिरहाको ठाडी भन्सार क्षेत्र अन्तर्गत पर्ने सीमा क्षेत्रमा सशस्त्र प्रहरीको अस्थायी जाँच चौकी राख्ने क्रममा भारतीय सीमा सुरक्षा बल (एसएसबी)ले अवरोध सिर्जना गरेको छ ।

आइतबार सशस्त्र प्रहरी बलले ठाडी भन्सार कार्यालयबाट दक्षिणतर्फ सीमा क्षेत्रमा अस्थायी जाँच चौकी राख्न खोजेको थियो । तर, भारतीय सीमा सुरक्षा बलका अधिकारीहरुले उक्त क्षेत्र दशगजा क्षेत्रमा पर्ने भन्दै जाँच चौकी राख्न दिएनन् ।

सिराका प्रमुख जिल्ला अधिकारी गोपालकुमार अधिकारीले भने सीमा क्षेत्रमा अहिले दुई देशको संयुक्त नाप–जाँच चलिरहेका कारण सीमा यकीन नगरी जाँच चौकी नराक्न भनेर एसएसबीले ‘अनुरोध’ गरेको जानकारी दिए ।

‘अहिले दक्षिणतर्फको सीमा क्षेत्रमा नेपाल र भारत दुवै देशका नापी अधिकारी सम्मेलिन संयुक्त टोलीको नाप–जाँच चलिरहेको छ । उक्त नापजाँच पछि उक्त क्षेत्र दशगजाअन्तर्गत पनि पर्न सक्ने भएकाले अहिलेका लागि जाँच चौकी नराखीदिन भनेर उनीहरु (एसएसबी)ले अनुरोध गरेका थिए,’ खबरहबसँगको टेलिफोन वार्तामा सिरहाका प्रमुख जिल्ला अधिकारी गोपालकुमार अधिकारीले भने, ‘हामीले पनि उनीहरुको अनुरोध मानेर अहिलेका लागि जाँच चौकी नराख्ने भनेका छौं ।’

सीडीओ अधिकारीका अनुसार ठाडी भन्सार कार्यालय क्षेत्रमा अहिले पनि सशस्त्र प्रहरीको बोर्डर आउट पोस्ट (बीओपी) छ । तर, सीमा क्षेत्रमा थप सुरक्षा जाँचको आवश्यकता महसुस गरेर अस्थायी जाँच चौकी राख्न खोजिएको सीडीओ अधिकारीको भनाइ छ ।

‘ठाडी भन्सार कार्यालय नजिकै पहिलेदेखि नै बीओपी छ । तर, सीमा क्षेत्रमा थप सुरक्षा जाँच आवश्यक परेका कारण अस्थायी चौकी राख्ने भनेका थियौं । संयुक्त नाप–जाँच चलिरहेका कारण केही दिनका लागि स्थगित भएको हो,’ सीडीओ अधिकारीले भने ।