काठमाडौं – निर्माता तथा निर्देशक मिलन चाम्सले केही समयअघि फिल्मका लागि नायिका चाहिएको भन्दै अडिसन आह्वान गरे । तर, त्यो अडिसन कहिले भयो, कसरी भयो भन्ने कुरा बाहिर ल्याएनन् ।

फिल्मवृत्तमा उनले खुलाएको त्यो अडिसन ‘फेक’ भएको भन्दै धेरैले मिडियाले समाचार बनाएनन् । त्यो फिल्मको काम कहाँ पुग्यो, कसैलाई पत्तो छैन । चाम्सले उक्त अडिसनमार्फत नायिकाको खोजी गरेका थिए ।

यतिबेला मिलन चाम्सले फिल्म ‘गोर्खा वारियर’ निर्माणको घोषणा गरेका छन् । फिल्ममा चल्तीका कलाकारको अभिनय रहने बताइएको छ । रमाइलो प्रसङ्ग के छ भने फिल्ममा नायिकाका रुपमा वर्षा शिवाकोटी अनुबन्ध भएकी छिन् ।

चाम्सले अडिसन आह्वान खुलाए पनि अन्ततः वर्षालाई नै फिल्ममा लिएका छन् ।

त्यसो त मिलन चाम्स र वर्षा शिवाकोटीको नाम जोडिएर गसिप बन्न थालेको लामो समय भइसकेको छ । पछिल्लो समय मिलनले वर्षालाई नै आफ्ना हरेक फिल्ममा लिने गरेका छन् । वर्षाले पनि अरु निर्माताका फिल्म नपाए पनि चाम्सका फिल्म आफ्नै होम प्रोडक्सनको फिल्मझैँ गरी पाइरहेकी छिन् ।

यसअघि ‘वीर विक्रम २’ मा पनि मिलनले वर्षालाई नै मुख्य भूमिकामा अभिनय गराएका थिए ।

फिल्मवृत्तमा के पनि हल्ला चल्ने गरेको छ भने, वर्षा शिवाकोटीसँगको सम्बन्ध बिग्रँदा मिलन चाम्सले नायिकाको खोजी भन्दै फेक अडिसन आह्वान गरेका थिए । तर, अहिले यी दुईबीच राम्रो सम्बन्ध छ ।

एकअर्कासँग नाम जोडिएर बारम्बार गसिप बने पनि सार्वजनिक रुपमा भने मिलनले वर्षासँगको सम्बन्धका बारेमा खासै कुरा गरेका हुँदैनन् । यता वर्षाले पनि चाम्सलाई ‘अभिभावक’ सरह भएको भन्दै दाबी गर्दै आइरहेकी छिन् ।