महिलाहरुमा फिस्टुलाको समस्या भएमा योनीबाट निरन्तर रुपमा पिसाब वा दिसा चुहिने समस्या हुन्छ ।  सुत्केरी हुँदा प्रसव व्यथा लामो हुँदा बच्चाको टाउको योनीमार्गमा धेरै समयसम्म रही टाउकोले थिचेको योनीमार्गको भागमा रक्तसञ्चार बन्द हुन्छ । जसले गर्दा रक्तसञ्चार बन्द भएको भागको कमलो मासु मर्छ र त्यहाँ प्वाल पर्छ ।

त्यस्तो प्वाल पिसाब थैली र योनीमार्गको विचमा परेको छ भने योनीमार्गबाट निरन्तर पिसाव चुहिन्छ । यदी प्वाल योनीमार्ग र दिसा थैलीको विचमा छ भने योनीमार्गबाट दिसा चुहिन्छ । कहिलेकाहीँ यस्तो प्वाल दुवै तर्फ हुन्छ । यस्तो अवस्थामा योनीमार्गबाट दिसा र पिसाब दुवै चुहिने समस्या हुन्छ ।

महिलामा किन हुन्छ फिस्टुला ?

महिलाहरुमा फिस्टुला हुनुको मुख्य कारण सुत्केरी गराउँदा १८ घण्टा भन्दा लामो व्यथा लाग्नु र योनीमार्गमा बच्चाको टाउको रहने अवस्था हुनु हो । धेरैजस्तो गर्भवती हुँदा नियमित स्वास्थ्य परीक्षण नगराउने महिलाहरुमा फिस्टुलाको समस्या हुने सम्भावना बढी हुन्छ ।

यसरी हुन्छ उपचार

फिस्टुला निको हुने समस्या हो । फिस्टुलाको उपचार शल्यक्रिया गरेर गरिन्छ । चिकित्सकहरुका अनुसार एक सय जना महिलामा ९५ जना महिलाको फिस्टुलाको समस्या उपचारबाट निको हुने गरेको छ । त्यसैर्ले फिस्टुलाको समस्या भएमा चिकित्ससँग परामर्श लिएर उपचार गर्नुपर्छ ।

फिस्टुला हुन नदिन के गर्ने ?

–कम उमेरमा विवाह नगर्ने,

–कम उमेर बच्चा नजन्माउने,

–बालिका तथा किशोरीलाई सन्तुलित आहार खुवाउने,

–गर्भवती महिलालाई पर्याप्त मात्रामा पोषिलो र सन्तुलित आहार खुवाउने,

– गर्भवती महिलाले नियमित स्वास्थ्य जाँच गराउने,

–सुत्केरी व्यथा लागेमा स्वास्थ्य संस्थामा लैजानले,

–दक्ष चिकित्सक वा स्वास्थ्यमर्कीको सहयोगमा बच्चा जन्माउने ।