काठमाडौं– राष्ट्रियसभा सदस्यको उम्मेदवार टुंगो लगाउन बसेको नेपाल कम्युनिष्ट पार्टी (नेकपा) सचिवालय बैठक बिनानिष्कर्ष टुंगिएको छ ।

प्रधानमन्त्री निवास बालुवाटारमा बसेको बैठकमा राष्ट्रियसभा सदस्यको उम्मेदवार टुंगो लगाउने विषयमा छलफल भए पनि सहमति जुट्न नसक्दा भोलि सम्मका लागि स्थगित भएको हो ।

प्रधानमन्त्रीसमेत रहेका नेकपाका अध्यक्ष केपी शर्मा ओलीले नेकपाका तर्फबाट उमेदवार हुने १६ जनाको नाम एकलौटी ल्याएको भन्दै अन्य सदस्यले विरोध जनाएपछि बैठक स्थगित भएको हो ।

“राष्ट्रियसभा निर्वाचनमा दुई जना राजपालाई दिने यसअघि नै सहमति भएको छ,”सचिवालयका एक जना सदस्यले भने, “बाँकी १६ जनाको नाम अध्यक्ष ओलीले आफू निकटका मात्रै लिएर आउनुभएको थियो । त्यसमा सदस्यहरुको विरोध रह्यो । विरोध भएपछि बैठक शुक्रबारसम्मका लागि स्थगित भएको छ ।”

उमेदवारको टुंगो लगाउन सचिवालय बैठक बिहीबार चार घण्टा बसेको थियो ।

राष्ट्रियसभाको उम्मेदवारी मनोनयन पुस २० गते र चुनाव माघ ९ गतेलाई तय गरिएको छ । जसमा १८ जना सदस्य निर्वाचित भएर आउने छन् ।