काठमाडौं – सत्तारुढ नेकपाका वरिष्ठ नेता तथा सांसद माधव कुमार नेपालले नेपाल वायुसेवा निगमको बिजोग बनाउन खोजिएको बताएका छन् ।

नेता नेपालले संसदको समितिमा बोल्दै यसअघि सरकारले निजीकरण गरेका राज्यका विभिन्न संरचनाहरु जस्तै वायुसेवा निगमको पनि बिजोग गराउन खोजेको बताएका हुन् ।

उनले अहिलेको अवस्थामा वायुसेवा निगम र अन्य निजी कम्पनीहरु हेर्दा निजी सेवा कम्पनी सधै फाइदामा गएको तर सरकारी सेवा प्रदायक सधै घाटामा जाने अवस्था आएको समेत बताए ।

साथै उनले अनेकौं एजेण्टहरुसँग मिलेर साँठगाँठ गर्दै विमानलाई मुनाफा कमाउने ठाउँमा पुग्न नदिने काम भइरहेको आरोप समेत लगाए ।

बैठकमा सहभागी अन्य सांसदहरुले पनि हिमालय एयरलाइन्सलाई ‘ग्राउण्ड ह्याण्डलिङ’ को जिम्मेवारी दिएर सरकारले नेपाल वायुसेवा निगमलाई धरासायी बनाउन खोजेको आरोप लगाएका छन् ।

‘ग्राउण्ड ह्याण्डलिङ’ निगमको मुख्य आयस्रोतका रुपमा रहेको र यसको मुख्य जिम्मा खोसेर सरकारले हिमालय एयरलाइन्सलाई दिएकोप्रति सांसदहरुले आपत्ति जनाएका छन् ।