काठमाडौं- नेपालको एक मात्र अन्तर्राष्ट्रिय विमानस्थलमा सामाजिक दूरीसहितको संरचना तयार भएको छ । त्रिभुवन विमानस्थलमा सामाजिक दूरी कायम गर्नेदेखि उडानका सबै प्रक्रिया व्यवस्थित गराउने गरी भौतिक संरचना निर्माणको तयारी पूरा भएको हो ।

अब विमानस्थलमा यात्रुबीच कम्तीमा एक मिटरको दूरीमै उभिनुपर्नेछ । नयाँ संरचनाले कर्मचारी र यात्रुबीच भौतिक रुपमा पनि उत्तिकै दूरी कायम गराउने छ ।

यसले कोरोनाको त्रास कम नभएसम्म हवाई यात्रुको समय भने बढाउने भएको छ । अन्तर्राष्ट्रिय उडानमा अब साविकको तुलनामा कम्तीमा एक घण्टा अगाडि नै विमानस्थल पुग्नुपर्ने अवस्था आएको छ ।

अब विमानस्थल सुरक्षा प्रवन्ध कायम गरी उडान सञ्चालनका लागि तयार भएको विमानस्थलका महाप्रवन्धक देवेन्द्र केसीले जानकारी दिए । लकडाउन र व्यवसायिक उडान प्रतिबन्धका बीच पनि यस विमानस्थलबाट ६ हजारभन्दा बढी मानिसले यात्रा गरिसकेको उनले बताए ।

यसबीचमा विमानस्थलमा अत्यावश्यक भौतिक संरचना निर्माणको काम समेत गरिएको थियो । सरकारले विदेशमा रहेका नेपालीलाई स्वदेश फर्काउन तयारी गरिरहेको छ । यसका लागि अब विमानस्थल तयार भएको केसीले बताए ।