बलिउड अभिनेता सलमान खानले मुम्बई प्रहरीका लागि पर्याप्त स्वास्थ्य सामग्री वितरण गरेका छन् ।

अभिनेता सलमानले मुम्बई प्रहरीलाई १ लाख वटा सेनिटाइजर प्रदान गरेका छन् । उनले सेनिटाइजरसँगै प्रहरीको सुरक्षाका लागि सोही मात्रामा मास्क पनि प्रदान गरेका छन् ।

अग्रभागमा रहेर सधैँ खटिरहने प्रहरीहरूमा कोरोना संक्रमणको उच्च जोखिम रहेकाले उनीहरू सुरक्षित रहनुपर्छ भन्ने सलामान खानको भनाइ छ ।

मुम्बई प्रहरीसँगको सल्लाहमा प्रहरीको माग बमोजिम सलमानले आफू ब्रान्ड एम्बेस्डर रहेको कम्पनी फेस्टको तर्फबाट प्रहरीलाई सेनिटाइजर प्रदान गरेका हुन् । यो सेनिटाइजरले प्रहरीलाई धेरै हदसम्म सुरक्षित बनाउने सलमानको विश्वास छ ।

सलमानले गरेको यो सहयोगले मुम्बई प्रहरीलाई ठूलो प्रोत्साहन मिलेको त्यहाँका मुख्यमन्त्री उद्धव ठकरेले बताएका छन् । फिल्म क्षेत्रमा मात्र नभएर हरेक क्षेत्रमा सलमान खानले गरेको सहयोग प्रशंसनीय भएको पनि ठकरेले बताए ।

इदको अवसरमा मुम्बईका विभिन्न व्यक्तिलाई आफ्नो सामाजिक संस्था ह्युमेन वाइङका तर्फबाट खाना खुवाए । मुम्बईमा रहेका गरिबहरूलाई खाना खुवाउने उनको अभियान अझै जारी छ ।