काठमाडौं – काठमाडौंको कपनमा बस्दै आएको ७१ परिवार म्यान्मारका रोहिंग्यालाई व्यवसायी सुदर्शन बस्नेतले राहत सामग्री वितरण गरेका छन् ।

नेपाल सरकारले शरणार्थी मान्यता नदिएका रोहिंग्याहरूलाई सरकारले गरेको लकडाउनका कारण दैनिक जीवन चलाउन खानाको अभाव भएको सूचना पछि बस्नेतले खाद्यान्नसहित राहत सामग्री वितरण गरेका हुन् ।

बस्नेतले प्रति परिवार पाँच केजी चामल, एक केजी दाल, १० प्याकेट बिस्कुट र नुहाउने साबुन वितरण गरेका हुन् । राहत सामग्री वितरण गर्दै बस्नेतले भने, ‘८६ जना बालबालिका समेत रहेको रोहिंग्या समुदायमा खाद्यन्नको अभाव भएको थाहा पाएपछि व्यक्तिगत खर्चमा खाद्यन्न वितरण गरेको हो ।’

बस्नेतले मानवअधिकारकर्मी मोहना अन्सारीलगायतको उपस्थितिमा सामान वितरण गरेका थिए ।

रोहिग्या शरणार्थी आयुष आलाम र रदिफ आलमलगायतमार्फत उनले राममन्दिर क्याम्पमा रहेका ७१ परिवारका लागि राहत वितरण गरेका हुन् । अहिले कपनमा ७१ परिवारमा ३५५ जना रोहिंग्या बस्दै आएका छन् । जसमा ८६ जना बालबालिका समेत छन् ।