काठमाडौं- मोहन वैद्य ‘किरण’ नेतृत्वको नेपाल कम्युनिस्ट पार्टी (क्रान्तिकारी माओवादी)ले नेपालमा कोरोना भाइरसको जोखिम रोक्नका लागि सरकाले चालेको कदमलाई लिएर विभिन्न कमजोरीहरु औंल्याएको छ ।

पार्टीका महासचिव वैद्यले बुधवार विज्ञप्ति जारी गर्दै विभिन्न ८ वटा कमजोरी सहित सुझाव दिएका छन् । जसमा  सीमा क्षेत्रमा अलपत्र नेपालीहरुको सरकारले उचित व्यवस्थापन गर्नुपर्ने माग गरेका छन् ।

विज्ञप्तिमा परीक्षणलाई विस्तार गरी संक्रमितहरु पत्ता लगाउने र तिनीहरुलाई आइसोलेसनमा राखी बाँकीलाई संक्रमित हुन नदिन समेत माग गरिएको छ । हाल सरकारले एक हजार साठी जनाको मात्र परीक्षण गरी नेपालमा जम्मा ५ जना संक्रमित भएको भनेर आत्मरति गरिरहेको समेत आरोप लगाइएको छ ।

‘यो अत्यन्त गैर जिम्मेवारपूर्ण काम हो। परीक्षणलाई जति धेरै विस्तार गरिन्छ त्यति छिटो यो महामारीबाट छुटकारा पाउने सम्भावना रहन्छ भन्ने कुरामा हाम्रो पार्टी सरकारको विशेष ध्यानाकर्षण गर्न चाहन्छ,’ विज्ञप्तिमा भनिएको छ।

सरकारले कोरोना नियन्त्रणका लागि केही घोषणा गरेको भए पनि व्यवहारमा लागू नहुँदा जनताको आँखामा छारो हाल्ने काम मात्र भएका बताइएको छ।

‘कोरोनाको बहानामा उपचार नपाएर मरिराखेका त छैनन् ? बुटवल र वीरगंजमा भएका मृत्युको कारण के हो ? चिकित्सकहरुबाट नै अन्तर्विरोधी कुराहरु बाहिर आइरहेको सन्दर्भमा यथार्थ के हो ? यसबारे सरकार बोल्नु पर्दछ,’ विज्ञप्तिमा उल्लेख छ।

यस्तो छ बिज्ञप्तिको पूर्ण पाठः