धादिङ- विश्वव्यापी महामारीको रुपमा कोरोना भाइरसको संक्रमण फैलिएसँगै नेपालमा जोखिम रोक्न सरकारले मुलुकभर लकडाउन गरे पनि उपत्यका बाहिरका त्यसको प्रभाव कम परेको छ ।

सरकारले लागू गरेको लकडाउन कार्यान्वयनका लागि स्थानीय तहले पनि आ-आफ्नो क्षेत्रबाट विभिन्न कदम चालिरहेका छन् । तरपनि उल्लंघनका घटना रोकिएका छैनन् ।

सरकाले लागू गरेको लकडाउनको उल्लंघन हुन नदिँन प्रहरीले धादिङको त्रिपुरासुन्दरी गाउँपालिका–२ र गोरखाको भीमसेन थापा गाउँपालिका–८ जोड्ने पुलमा ताल्चा लगाएको छ ।

दुई जिल्लाका मानिसहरुका आवागमन बढ्न थालेपछि कोरोना भाइरसको जोखिमलाई मध्यनजर गर्दै प्रहरीले पुलमा नै ताल्चा लगाएको हो ।

आफ्नो वडा भन्दा बाहिरको मानिसहरु घुम्न, आवतजावत गर्न, ससुराली, आफन्त भेटघाट गर्न भन्दै मान्छेहरु गाउँमा आउने क्रम बढ्न थालेपछि प्रहरी र स्थानीयवासीकै सक्रियतामा झोलुङ्गेपुलमा आवतजावत गर्न रोक लगाइएको हो ।