काठमाडौं- कोरोना भाइरस(कोभि- १९) संक्रमणको जोखिमलाई ध्यान दिँदै सरकारले गरेको लकडाउनका कारण प्रभावित दैनिक ज्यालादारी र आश्रित परिवारलाई सहयोग गरिएको छ ।

काठमाडौको कागेश्वरी मनहरा नगरपालिक- ९ मा बसोबास गरि दैनिक ज्याला मजदूरी गरी परिवार चलाउँदै आएका परिवारलाई खाद्य सामग्रीसहित सहयोग गरिएको हो ।

कागेश्वरी मनहरा नगरपालिका वडा नम्बर-९ मा रहेको प्रगती टोल विकास समितिले आफ्नो क्षेत्रमा रहेका दैनिक ज्यालादारी व्यक्तिहरुको पहिचान गरि खाद्य सामग्री हस्तान्तरण गरेको हो ।

लकडाउनका कारण दैनिक काम रोकिएको र दैनिक ज्याला गरि खानेहरु समस्यामा परेको भन्दै समितिले खाद्यान्न(चामल, दाल, नुन, तेल, साबुन) वितरण गरेको हो ।

‘दैनिक ज्याला मजदूरी गरि परिवार धान्दै आएकालाई लकडाउनले गर्दा समस्या परेको पाइयो,’ समितिका अध्यक्ष राजेन्द्र तिमल्सिनाले भने, ‘यस स्थानमा बसेर दैनिक मजदुरी गर्दै आउनुभएकाहरुको पहिचान गरी खाद्यान्न बितरण गरिएको हो ।’

अध्यक्ष तिमल्सिनाले आज केही परिवारलाई राहत वितरण गरिएको र अन्य पनि प्रभावित भएको खण्डमा सहयोग गर्ने बताए ।

उनले वैदेशिक रोजगारीबाट आएर, ज्वरो र कोरोनाको लक्षण देखिने केही समस्य भए तत्काल सम्पर्क गर्न आग्रह गरेका छन् । वडा र नगरपालिकासँगको समन्वयमा उचित व्यवस्था गरिने उनले बताए ।