आफ्नो मुलुकमा कोरोना भाइरसको प्रकोप बढ्दै गएपछि जर्मनी भ्रमणमा निस्केका थाइल्याण्डका राजा महा वजिरलङ्कोर्ण यतिबेला एउटा विलासी होटेलमा सेल्फ क्वारेन्टाइनमा बसिरहेको समाचार सार्वजनिक भएको छ ।

बेलयतबाट प्रकाशित हुने द इण्डिपेन्डेन्ट अखबारका अनुसार उनी यतिबेला जर्मनीको दक्षिणी शहर गेर्मिस–पार्टेनकिर्चेनको ग्राण्ड होटेल सोनेबिखलमा बसिरहेका छन् ।

सोही शहरमा रहेका अरु होटेल भने बन्द छन् ।

२० युवती र नोकरचाकरसहित ६७ वर्षे राजालाई सेल्फ क्वारेन्टाइनमा बस्न दिनका लागि प्रशासनले विशेष अनुमति दिएको जनाइएको छ ।

उनीसँगै सेल्फ क्वारेन्टाइनमा बसिरहेका २० जनामध्येमा उनका श्रीमतीहरु छन् कि छैनन् भन्ने अझै स्पष्ट नभइसकेको जर्मनीबाट प्रकाशित हुने बिल्ड अखबारले जनाएको छ ।

यता स्वेदशमा भने राजाको यो कदम निकै अलोकप्रिय बन्न पुगेको छ ।

थाइल्याण्डको सामाजिक सञ्जालमा ‘हामीलाई किन राजा चाहियो’ भन्ने ह्यास्ट्याग ट्रेण्डिङमा छ ।

थाइल्याण्डमा हालसम्म कोरोना भाइरसका कारण १ हजार ७ सय ७१ जना संक्रमित छन् भने कोरोना भाइरसका कारण हालसम्म १२ जनाको मृत्यु भइसकेको छ ।