वीरगन्ज– पैदल हिँडेर खुला सीमा क्षेत्रबाट स्वदेश जान खोज्ने ३ सय ५० जना भारतीय नागरिकलाई प्रहरीले पक्राउ गरेको छ ।

जिल्ला प्रहरी कार्यालय पर्साको टोलीले इनरुवा नाकाबाट भारत प्रवेश गर्न खोज्ने ३ सय ५० जनालाई पक्राउ गरेको हो ।

जिल्ला प्रहरी कार्यालय पर्साकी प्रमुख प्रहरी उपरीक्षक (एसपी) गंगा पन्तका अनुसार पक्राउ परेकाहरु पोखरा, चितवन लगायत क्षेत्रबाट पैदल हिँडेर वीरगन्ज आइपुगेका हुन् ।

मंगलबार मध्यराति भारत प्रवेश गर्न खोज्ने क्रममा उनीहरुलाई पक्राउ गरिएको एसपी पन्तले बताइन् ।

पक्राउ परेकालाई अहिले वीरगन्जस्थित ठाकुरराम बहुमुखी क्याम्पस र अर्को एक छात्रबासमा राखिएको छ ।

उनीहरुलाई आएको ठाउँमै फिर्ता पठाउने वा वीरगन्जमा नै क्वारेनटाइनमा राख्ने भन्ने विषयमा छलफल भइरहेको एसपी पन्तको भनाइ छ ।