काठमाडौं– नक्कली सवारी चालक अनुमतिपत्र (लाइसेन्स) बनाएर बिक्री गर्ने ४ जना पक्राउ परेका छन् ।

काठमाडौंको न्यूरोड (पिपलबोट)स्थित फोटो कन्सर्नमा खानतलासी गर्दा नक्कली स्मार्ट लाइसेन्स र अन्य परिचय पत्र बनाउने ४ जनालाई पक्राउ गरिएको प्रहरीले जनाएको छ ।

महानगरीय ट्राफिक प्रहरी महाशाखा र महानगरीय अपराध महाशाखाबाट गएको टोलीले फोटोकन्सर्नबाट ४ जनालाई पक्राउ गरेको हो ।

पक्राउ पर्नेमा काठमाडौंको चावहिल बस्ने अनन्ता गुरुङ, लाजिम्पाट बस्ने कुमार तण्डुकार, अनामनगर बस्ने अशोक कार्की र कोटेश्वर बस्ने मोहन यादव छन् ।

प्रहरीका अनुसार उनीहरुले नक्कली स्मार्ट लाइसेन्स छापेर बिक्री गर्ने गरेका थिए ।

प्रहरीले फोटो कन्सर्र्नसमा नक्कली लाइसेन्स बनाउन गएका २ जनालाई समेत पक्राउ गरेको छ । पक्राउ पर्नेमा काठमाडौंको कुलेश्वर बस्ने सुवास रोक्का र सर्लाहीका दीपक ब्लोन छन् ।

प्रहरीका अनुसार उनीहरुले एउटै नक्कली लाइसेन्स ५ देखि १५ हजारसम्ममा बिक्री गर्ने गरेका थिए ।